प्यँगू मति परिवर्तन अभ्यास
नमः श्री सद्गुरूभ्यः
शरणागमन + बोधिचित्त
बुद्धं च धर्मं च गणोत्तमं च यावद्धि बोधिं शरणं गतोऽस्मि
दानादिपुण्यैश्च कृतैर्मयैभि बुद्धो भवेयं जगतो हिताय ।।
बुद्ध, धर्म व गणोत्तमया
जि वने शरणे बोधि मथ्यँतले
दानादि जिगु पुण्य प्रभावं बुद्ध जुइ फयेमा जगहितनितिं ।।
चतुर्ब्रम्हविहार
सर्वे सत्त्वाः सुखैश्चैव युक्ताः स्युः सुखकारणैः
भवन्तु सततं मुक्ता दुःखाश्च दुःखकारणात् ।
कदापि वञ्चिता न स्युर्दुःखहीन महासुखात् ।
दूरादूरद्वेषरागमुक्तोपेक्षास्थिता हि स्युः ।।
दक्व सत्त्व युक्त जुइमा सुखं, सुखहेतुनं
मुक्त जुइमा न्ह्यावलेँ दुःखं, दुःखयागु व हेतुनं
मजुइमा गुवलेँ वञ्चित दुःखहीन महासुखं
द्वेष रागं मुक्त जुइमा उपेक्षास च्वना च्वना ।
अमूल्य मानवदेहया प्राप्ति
च्यागू 'क्षण' व झिगू 'सम्पत्ति' पाखेँ युक्त जूगु थ्व मनुष्य जीवन प्राप्त जूगु दु । थ्व प्राप्त जुइकेगु अति दुर्लभ खः ।
च्यागू अक्षण थुकथं दु ।
१. नरकय् जन्म जुइगु
२. प्रेत जुया जन्म जुइगु
३. पशु जुया जन्म जुइगु
४. म्लेच्छ (धर्म मानेयाइमखुपिं वा विपरित धर्म मानेयाइपिं) जुया जन्म जुइगु
५. दीर्घायुपिं देवता जुया देवलोकय् जन्म जुइगु
६. मिथ्यादृष्टि जुया जन्म जुइगु
७. बुद्ध मदुगु देश काल परिस्थितिइ जन्म जुइगु ।
८. लाटो बुङ्गो जुया जन्म जुइगु
जि थुपिं च्यागूलिं अक्षण पाखेँ मुक्त जू । अहो ! गुजागु अमूल्य जन्म प्राप्त जूगु खनि । का स्व! थुपिं अक्षणय् जन्मे जूगु जुसा जिगु छु जक हालत जुइगु जुइ । नरक, प्रेत वा तीर्यक (पशु) योनीइ जन्मे जूगु जुसा दुःखया भुमरीइ जि फसे जुइगु खः । म्लेच्छ जुया जन्मे जूगु जुसा याये त्योगु मत्योगु धैगु ज्ञान मथुया जि ला दुखे दुनिगु खनि । दीर्घायु देवता जुया जन्म जूगु जुसा प्रमादय् लाना तक्यना च्वनिगु खनि । मिथ्यादृष्टिं युक्त जूगु जुसा आशय व धारणा फुक्कं अखः जुया गुवलेँ तरे मजुइगु खनि । बुद्ध मदुगु देश काल परिस्थितिइ जन्मे जूगु जुसा मनू हे जुसां सद्धर्म न्यने मदइगु खनि । इन्द्रिय विकल जुया जन्मे जूगु जुसा चित्त सशक्त मजुया कार्य अकार्यया विचाः याये मफइगु खनि । अहो धन्य अमूल्यगु जन्म प्राप्त जूगु दु । थुजाःगु 'अक्षण' पाखेँ मुक्त जूगु 'क्षण' सम्पदां युक्त जूगु जन्म प्राप्त जुगू खनि ।
न्यागू स्व-सम्पत्ति व न्यागू परसम्पत्तिपाखेँ युक्त जूगु अमूल्य जन्म प्राप्त जूगु दु ।
१. मनुष्य जुया जन्मेजुइगु तसकं दुर्लभ खः । अहो अमूल्य जुनी ।
२. सद्धर्म न्ह्याना च्वँगु मध्यदेशय् जन्मे जुयागु दु । गुलि थुजाःगु थाय् त नं दु गन सद्धर्म न्यनेगु दइ मखु । अन जन्मे जूगु जूसा जिगु छु हालत जुइगु थेँ । अहो अमूल्य जुनी ।
३. अपाङ्ग वा सुस्त मनस्थिति मजुसे जिगु झिगू नं इन्द्रिय त पायछि अवस्थाय् दु । मखुसा जिगु छु हालत जुइगु थेँ । अहो अमूल्य जुनी ।
४. बुद्ध एवं सद्धर्म प्रति श्रद्धा नं दया च्वँगु दु । मखुसा थ्व जगतय् मिथ्या धारणा व सिद्धान्त त आपालं दु । उखेपाखे हे जि तक्यँगु जूसा छु जुइगु जुइ । अहो अमूल्य जुनी ।
५. जिं छुँ नं आनन्तर्य कर्म अतिक्रमण यानागु मदु । पितृवध, मातृवध, अर्हत् वध, संघभेद व तथागतया शरीरं दुष्ट आशय तया हि पिकायेगु थेँ जाःगु पाप कर्म त जिगु पाखेँ जूगु मदु । अथे जूगु जुसा जि थ्व जन्मला छु अनन्त जन्म तक नरक भोग बाहेक जिगु मेगु छुँ गति हे जुइ मखूगु खः । अहो अमूल्य जुनी ।
धन्य ख, थुपिं न्यागुलिं स्वसम्पत्ति पाखेँ युक्त जूगु जिगु थ्व अमूल्य जुनी ।
अथेहे,
- बुद्ध बिज्याःगु युगय् जन्मे जूगु दु ।
- बुद्ध बिज्याःसां धर्म खँ मस्यँसे नं बिज्यायेफूगु खः । तर सद्धर्म स्यना बिज्याःगु परिस्थितिइ हे जन्मे जूगु दु ।
- स्यना बिज्याःगु धर्म नं विकृत जुया तना वने फु । तर अझ हे म्वाना च्वँगु अवस्थाय् जन्म जूगु दु ।
- सद्धर्मया अनुयायीपिं आपालं दूगु हे अवस्थाय् जन्म जूगु दु । गुकिंयाना संघया दर्शन चूलात ।
- गुरूपिनि करूणा गाक्क दूगु बखतय् हे जन्मे जूगु दु गुकिंयाना धर्मश्रवण याये खन । अहो अमूल्य जुनी ।
थथे न्यागूलिं परसम्पत्तिं नं युक्त जूगु थ्व अमूल्य मानव जन्म प्राप्त जूगु दु । अहो अमूल्य जुनी । थथे झिंच्यागूलिं गुणं युक्तगु मनुष्य जन्म तसकं दुर्लभ खः । अहो अमूल्य जुनी। जन्म जन्मान्तरया कुशल कर्मया पुण्यं जक थ्व मानव जन्म प्राप्त जुइगु खः । थ्व जुनीइ व न्हापाया जन्मे सिइकं मसिइकं जूगु अकुशल कर्मंयाना थुजाःगु जीवन हाकनं प्राप्त यायेत तसकं थाकु । अहो अमूल्य जुनी ।
संख्याया हिसावं नं मनुष्यपिं सिवे मेपिं प्राणीपिं करोडौं गुणा अप्पो दु । उकिं मनू जुया जन्म कायेगु थाय् नं अतिकं कम जक दु । थुकथं सीमित स्थान जूगु दुर्लभ मनुष्य जन्म प्राप्त जूगु दु । अहो अमूल्य जुनी ।
भगवान् बुद्धं उपमा ब्यूगु कथं थ्व मनुष्य जन्म धैगु महासागरय् ल्येँपुया च्वँगु प्वाः दुगु छगः सिंइ सय बर्षय् छको जक समुद्रय् द्योने थहाँ वइम्ह काँम्हं कापलिया छ्यँ अथे थहाँ वःगु वखतय् उगु सिंया प्वालय् स्वाराक्क दुहाँ वनिगु गुलि दुर्लभ जुइ उलिहे मनुष्य जन्म नं दुर्लभ खः । अहो अमूल्य जुनी ।
थुजाःगु सुअवसर नं न्हिन्हिसिया न्हिन्हि फुना वना च्वँगु दु । अहो अमूल्य जुनी ।
थ्व अवसर नं अनित्य हे खः । अहो अमूल्य जुनी ।
परिणामना
एतत्साधनपुण्येन सर्वे सर्वज्ञतापदम्
प्राप्नुवन्तु जयन्तु चाकुशलं कर्मवैरिणम् ।
जन्ममृत्युजराब्याधि स्वरूपार्वतपूरिताम्
मोचयाम सर्वसत्त्वान् दुर्गमाद् भवसागरात् ।
थ्व साधनाया पुण्यं थ्यने दक्वं सर्वज्ञपद
त्यायेमा फुक्क अकुशल कर्मशत्रु पाखेँ हानं
जन्म मृत्यु जरा ब्याधि रूपी भुमरीयुक्त थ्व
दुर्गम्य भव पाखेँ तरेयाये दक्व सत्त्वपिं ।
Comments
Post a Comment